Ku wa gatandatu tariki ya 10 Gicurasi 2025, Nyiricyubahiro Musenyeri Visenti HAROLIMANA Umushumba wa Diyosezi ya Ruhengeri yifatanyije n’ishuri ribanza ryaragijwe Mutagatifu Mariko kwizihiza umunsi mukuru wa Mutagatifu Mariko ryisunze. Ni ishuri riherereye muri Paruwasi Katedrali ya Ruhengeri. Igitambo cya Misa cyayobowe na Nyiricyubahiro Musenyeri Visenti HAROLIMANA Umwepiskopi wa Diyosezi ya Ruhengeri. Yatanze amasakramentu ku babyiteguye basaga 85 barimo abahawe Batisimu, Ukaristiya ya mbere n’Ugukomezwa.

Nyiricyubahiro Musenyeri yasabye abanyeshuri baryigamo kurushaho gukunda gusenga, gusoma no kumva Ijambo ry’Imana, kwitabira misa, kubaha ababyeyi n’abarezi, kwirinda ikibi cyose, guharanira kubana neza na bagenzi babo, kurangwa n’imyitwarire myiza no gukunda ishuri baharanira kuzaba abantu b’ingirakamaro bahesha ishema imiryango yabo, Kiliziya n’igihugu.

Umushumba wa Diyosezi ya Ruhengeri yasabye ababyeyi b’abanyeshuri guharanira kurangwa n’urukundo, amahoro n’imibanire myiza mu miryango yabo birinda amakimbirane. Yabakanguriye kurushaho kwita ku burere bw’abana babo, kubatoza urukundo, ubuvandimwe n’amahoro. Yasabye abarezi n’ababyeyi bo muri iryo shuri gukomera ku bufatanye mu kwita ku bana.Yashimye ubwitange, urukundo n’umurava by’abarezi baryigishamo, abahamagarira kurushaho gukorana ubwitange ubwo butumwa. Yashimye intambwe iri shuri rigezeho, aryifuriza gukomeza kujya mbere. Yaryijeje gukomeza kuriba hafi.

Umuyobozi w’Akarere wungirije ushinzwe imibereho myiza y’abaturage mu Karere ka Musanze KAYIRANGA Théobard yashimye Diyosezi ya Ruhengeri ku musanzu itanga mu iterambere ry’Akarere ka Musanze binyuze mu bikorwa binyuranye birimo n’iby’uburezi, ayizeza gukomeza ubwo bufatanye.

Abanyeshuri bashimye Umwepiskopi wabo waje kwifatanya nabo muri ibyo birori. Bavuga ko guhimbaza uwo munsi bibabasha kuzirikana ku mateka ya Mutagatifu Mariko waragijwe iryo shuri bigaho, bagaturirwa Igitambo cya Misa, bakidagadura, bagasabana, bakagaragaza impano bifitemo. Bishimira ko baherekezwa n’ababyeyi babo muri uwo munsi mukuru. Bagaragaza ko bakomeye ku ntego yo kwiga no gutsinda neza bakazigirira akamaro, bakakagirira imiryango yabo, Kiliziya n’igihugu muri rusange.

Ishuri ryitiriwe Mutagatifu Mariko ni ishuri ribanza ryigenga rya Kiliziya Gatolika; ryashinzwe mu mwaka wa 2009, ubu ryigamo abanyeshuri 1036. Uwo munsi mukuru waranzwe n’igitambo cy’ukaristiya, indirimbo, imbyino, imikino, imivugo, gutanga impano, gutanga ibihembo ku banyeshuri n’abarezi babaye indashyikirwa n’ubusabane.

Marie Goretti NYIRANDIKUBWIMANA