Ku gicamunsi cyo ku wa kane tariki ya 10 Mata 2025 Musenyeri Visenti BARUGAHARE, umusaseridoti wa Diyosezi ya Ruhengeri, yitabye Imana azize uburwayi, mu Bitaro byitiriwe Umwami Fayisali i Kigali. Gahunda yo kumuherekeza yabanjirijwe na Misa yo kumusabira n’umugoroba wo kuzirikana ubuzima bwe ku wa 15/04/2025 kuri Paruwasi ya Busogo. Misa n’umuhango wo kumushyingura byabaye bukeye ku wa gatatu tariki ya 16 Mata 2025 muri Paruwasi Katedarali ya Ruhengeri.

Igitambo cy’Ukaristiya cyayobowe na Nyiricyubahiro Antoni Karidinali KAMBANDA, Arikiyepisikopi wa Kigali ari kumwe na Nyiricyubahiro Musenyeri Vinsenti HAROLIMANA, Umwepisikopi wa Diyosezi ya Ruhengeri, Nyiricyubahiro Musenyeri Anaclet MWUMVANEZA, umwepiskopi wa Diyosezi ya Nyundo, Nyiricyubahiro Musenyeri Papiyasi MUSENGAMANA, Umwepisikopi wa Diyosezi ya Byumba, n’Abepiskopi batatu bari mu kiruhuko : Nyiricyubahiro Musenyeri Smaragde MBONYINTEGE, Nyiricyubahiro Musenyeri Serviliyani NZAKAMWITA na Nyiricyubahiro Musenyeri Kizito BAHUJIMIHIGO. Hari kandi n’ibisonga by’abepiskopi ba Diyosezi ya Byumba, Kibungo, Nyundo na Gikongoro, abapadiri ba Diyosezi ya Ruhengeri n’abandi baturutse mu yandi madiyosezi, abihayimana, abagize umuryango wa Musenyeri Visenti BARUGAHARE, abayobozi mu nzego za Leta n’iz’umutekano n’abakristu baturutse mu maparuwasi agize Diyosezi ya Ruhengeri by’umwihariko aho Musenyeri BARUGAHARE yakoreye ubutumwa.

Mu ntangiriro y’igitambo cy’Ukaristiya Nyakubahwa Musenyeri Gabin BIZIMUNGU, igisonga cy’umushumba wa Diyosezi ya Ruhengeri, yagejeje ku bakristu inshamake y’ubuzima bwa Musenyeri Visenti BARUGAHARE. Nyuma yo gutangaza Ivanjili, Nyiricyubahiro Musenyeri Serviliyani NZAKAMWITA ni we watanze inyigisho. Ahereye ku masomo matagatifu, yavuze ko Musenyeri BARUGAHARE nyuma y’ubutumwa yakoze bwo gahuza Imana n’abantu, akabanira abandi na bo bakamubanira, agiye kugororerwa mu ijuru kubera ibyiza yakoze. Yakomeje kandi abakristu muri aya magambo abahumuriza : ‟Yego turababaye kuko adusize, ariko muhumure agiye kuduteguriza, agiye ku Mana kudusabira. Ntabwo tuzongera kumubona, ariko turi kumwe kuko aho agiye ari ku Mana, kuva ubu tugiye kujya duhurira mu Mana”. Musenyeri NZAKAMWITA yavuze ko yamenyanye na Musenyeri BARUGAHARE bakiri bato, bari baturanye barahurirana umuriro, akaba yari murumuna we kuko ari na we wamufashe akaboko amujyana mu Iseminari nto aho Musenyeri Nzakamwita yari afite imyaka 19 naho Musenyeri BARUGAHARE afite 14.

Abantu batanze ubuhamya ku buzima bwe, bahurije ku kuba Musenyeri BARUGAHARE yari umusaseridoti wari ufite ukwemera gukomeye, urukundo rwa kivandimwe, ukwizera, kwihangana, gutega amatwi no kwitangira Kiliziya, bityo akaba yaradusigiye umurage urimo isomo rikomeye. Yaranzwe n’ubwitonzi, ubutabera, ubwizige n’ubutwari. Bwana NDANDALI Didace, wavuze ahagarariye umuryango Musenyeri Visenti BARUGAHARE avukamo, yavuze ibikorwa byiza byaranze Musenyeri BARUGAHARE n’umurage w’ineza asigiye abo yitagaho. Marie Claire BUGENIMANA, umwe mu bagize umuryango wa Foyer de Charité Remera- Ruhondo, na we yavuze uko Musenyeri BARUGAHARE yababaniye neza, akababera umubyeyi w’inararibonye. Yahaye ubuzima bwe Imana ntacyo asize inyuma…yakundaga Kiliziya kandi akaba uwa Kiliziya.

Padiri NIYIGENA Charles Clément, Padiri mukuru wa Paruwasi ya Busogo ari na yo Musenyeri Visenti BARUGAHARE yakoreragamo ubutumwa, yavuze ko Musenyeri BARUGAHARE yari umusaseridoti ufite ukwemera n’urukundo rwa kivandimwe. Yakundaga cyane isengesho cyane cyane guhimbaza Misa. Yakiraga abazaga babagana n’urugwiro rwinshi, agasabana na bose, agakunda gusoma ibitabo kandi akabisangiza n’abandi.

Nyiricyubahiro Musenyeri Smaragde MBONYINTEGE na we yatanze ubuhamya kuri Musenyeri BARUGAHARE muri aya magambo : ‟Musenyeri BARUGAHARE twarabanye mu Nyakibanda turi abafaratiri mu ishuri rimwe, twarabanye mu busaseridoti. Mu nzira ye ya gisaseridoti n’iya gikirisitu. Yubatse imibereho myiza y’ubusaseridoti, yari umuvandimwe wa twese, yaturwanyeho twese, akaba umuyoboke w’Imana, yari afite urukundo rwa Kiliziya rutavuga cyane ngo rusakuze ariko rukagaragara…Adusigiye urwibutso rwiza rw’ukuntu umupadiri yitwara mu bandi”.

Nyiricyubahiro Antoni Kardinali KAMBANDA we yavuze ko Musenyeri BARUGAHARE adusigiye umurage w’umusaseridoti mwiza by’umwihariko mu burezi. Yamumenye babana bya hafi nk’abarezi mu Nyakibanda, bafatanya ubutumwa bwo kurera abasaseridoti. Hari abapadiri benshi baba mu Rwanda no mu mahanga barezwe na we mu nzira igana ubusaseridoti. Nyiricyubahiro Karidinali yasoje ahamya ko Musenyeri BARUGAHARE yari urugero rw’uko umusaseridoti ayobora imbaga y’Imana.

Nyiricyubahiro Musenyeri Visenti HAROLIMANA, umwepiskopi wa Diyosezi ya Ruhengeri, yavuze ko Musenyeri BARUGAHARE yari umusaseridoti w’inyangamugayo kandi ukwiye kwizerwa. Yaranzwe n’ubwiyoroshye, ukumvira, no gukunda ubutumwa ndetse no guhabwa amasakramentu. Musenyeri BARUGAHARE yari umuntu w’Imana koko, umukistu mwiza, umusaseridoti ubereye Kiliziya kandi w’ingirakamaro, w’imfura, waranzwe no kwicisha bugufi, kubaha, kumvira. Yari umuntu w’intangarugero, umuntu utuje kandi uzi gutega amatwi, umuntu w’amahoro, umuntu wo kwizerwa. Nyuma y’ubuhamya, Nyiricyubahiro Musenyeri Visenti HAROLIMANA, umwepiskopi wa Diyosezi ya Ruhengeri, yayoboye umuhango wo gusezera bwa nyuma kuri Musenyeri Visenti BARUGAHARE. Yashyinguwe mu irimbi ry’abapadiri kuri Katedrali ya Ruhengeri.

Yavutse tariki 01/01/1948 kuri Yozefu RUBWEBWE na Mariya NYIRAMARUHE. Aho yavukiye ubu ni muri Paruwasi Nyarurema, Diyosezi ya Byumba, mu Karere ka Nyagatare, Intara y’Iburasirazuba. Yabatijwe tariki 20/04/1961 ni na bwo yahawe Ukaristiya ya mbere. Yakomejwe tariki 31/05/1961. Ku wa 02/06/1974, yaherewe Ubudiyakoni ku Nyundo. Ku wa 29/06/1975 yaherewe Ubupadiri i Roma na Mutagatifu Papa Paul VI. Intego ye y’ubusaseridoti ni iyi ngiyi:“Ngaha ndaje Nyagasani, ngo nkore ugushaka kwawe” (Heb 10,9). Ku wa 24/3/2014, yashyizwe mu rwego rw’ibyegera bya Papa (Prélats de Sa Sainteté), mu mvugo igenekereje, iwacu twamwitaga Umwizerwa wa Papa. Mu mwaka wa 77 w’amavuko n’uwa 50 y’ubupadiri, ku gicamunsi cyo ku wa kane tariki ya 10 Mata 2025, nibwo yitabye Imana azize uburwayi, mu Bitaro byitiriwe Umwami Fayisali i Kigali. Nyagasani namwiyereke iteka mu ihirwe ry’ijuru, aruhukire mu mahoro. Amen.

Padiri Ariston NDAYIRINGIYE