Ku wa gatandatu tariki ya 12 Nyakanga 2025, muri Diyosezi ya Ruhengeri, kuri Katedrali ya Ruhengeri, ku Ngoro ya Bikira Mariya Umwamikazi wa Fatima, Nyiricyubahiro Musenyeri Visenti HAROLIMANA, Umwepiskopi wa Diyosezi ya Ruhengeri, yayoboye Misa yatangiyemo isakramentu ry’Ubusaseridoti. Abafaratiri batatu bahawe ubudiyakoni: Jean Damascène NIYONGABO, Elisa NYAMINANI na Christian TURAMBANE. Abadiyakoni 9 (7 ba Diyosezi ya Ruhengeri, na 2 bo mu muryango w’abapadiri b’abamariyani) bahawe ubupadiri. Dore amazina yabo n’aho Umwepiskopi yabohereje mu butumwa: Padiri Jean Olivier HAKIZIMANA: Paruwasi ya Nyamugali, Padiri Jean Renovatus IRADUKUNDA: Paruwasi Rwaza mu ishuri Groupe Scolaire Marie Reine Rwaza, Padiri Janvier MBERABAGABO: Paruwasi ya Janja, Padiri Olivier NDUWAYEZU: Paruwasi ya Nkumba, Padiri Aloys NSHIMIYIMANA: Paruwasi ya Mwange, Padiri Barnabé UWANYAGASANI: Paruwasi ya Gashaki, Padiri Jean de Dieu NSHIMIYIMANA: Paruwasi Kanaba. Padiri Noel SINGIZUMUKIZA na Padiri Célestin NTEZIMANA bo mu muryango w’Abamariyani bo ubutumwa bazabuhabwa n’Umukuru w’umuryango wabo. Ibyo birori byahuriranye n’uko abapadiri batatu (Eugène TWIZEREYEZU, Cyprien NIYITEGEKA na Bonaventure TWAMBAZIMANA) bahimbaje Yubile y’imyaka 25 bamaze bahawe Isakramentu ry’Ubusaseridoti mu rwego rw’ubupadiri. Ibyo byiza byose ni umugisha Imana yahaye Diyosezi ya Ruhengeri muri uyu umwaka mutagatifu wa 2025, umwaka wa Yubile y’impurirane : muri Kiliziya y’isi yose na yubile y’imyaka 125 Inkuru nziza imaze igeze mu Rwanda.

Ni ibirori byitabiriwe na Nyiricyubahiro Musenyeri Kizito BAHUJIMIHIGO, Umwepiskopi wa Diyosezi ya Kibungo uri mu kiruhuko, abapadiri n’abiyeguriyimana benshi, Guverineri w’Intara y’Amajyaruguru n’abandi bayobozi mu nzego zitandukanye za Leta n’iz’umutekano, n’abakristu benshi cyane. Padiri Jean Renovatus IRADUKUNDA wavuze mu izina rya bagenzi be bahawe ubupadiri yashimiye Imana kubera ingabire yabahaye ku buntu bwayo. Yashimiye kandi Nyiricyubahiro Musenyeri Visenti HAROLIMANA, Umwepiskopi wa Diyosezi ya Ruhengeri, n’abandi bantu bose babafashije mu rugendo rugana ubusaseridoti. Yavuze ko bishimiye ibyiza byose Imana yabakoreye kandi ko bafite umugambi wo kuba abasaseridoti bahora barangamiye Kristu Soko y’amizero, ubuvandimwe n’amahoro no gushora imizi muri We.

Umubyeyi uhagarariye ababyeyi b’intore za Nyagasani zahawe Ubusaseridoti uwo munsi yavuze ko bishimiye cyane ibyiza Imana yakoreye abana babo n’imiryango yabo kandi ahamya ko bazakomeza gufasha abapadiri n’abadiyakoni bashya mu buzima n’ubutumwa bwabo.

Padiri Cyprien NIYITEGEKA wavuze mu izina ry’abakoze Yubile yashimangiye ko bose bahuriye ku byishimo by’ubusaseridoti bakesha Imana. Yashimiye abantu bose babafashije mu buzima n’ubutumwa bwabo nk’abapadiri kandi avuga ko bazakomeza ubutumwa bwo kurushaho kumenya Yezu Kristu, kumumenyesha no kumukundisha abandi, no guharanira ubumwe bw’abana b’Imana.

Nyakubahwa Maurice MUGABOWAGAHUNDE Guverineri w’Intara y’Amajyaruguru yashimiye cyane abahawe Ubusaseridoti abifuriza ubutumwa bwiza. Yashimiye na Diyosezi ya Ruhengeri uruhare rwayo mu gutagatifuza imbaga y’Imana, kwigisha Ijambo ry’Imana, gufasha abantu kugera ku iterambere rya muntu wuzuye no kurushaho gutera imbere mu bukungu. Yasabye abakristu kubaha no kumvira abasaseridoti no gukomeza gukorana nabo neza mu butumwa, mu bumwe no mu bufatanye. Mu gusoza, yabashishikarije kurushaho kwita ku isuku, kurangwa n’ubumwe, kwimakaza gahunda ya Ndi umunyarwanda, kwita ku burere bw’abana n’urubyiruko, kuba umuryango utunganye uzira amakimbirane kuko ni ryo juru ritoya, no gukomeza kubungabunga umutekano n’ubusugire bw’igihugu cyacu.

Mu ijambo nyamukuru ry’umunsi, Nyiricyubahiro Musenyeri Visenti HAROLIMANA, Umwepiskopi wa Diyosezi ya Ruhengeri, yavuze ko ibyishimo by’uyu munsi Diyosezi ya Ruhengeri ibikesha ubuntu bw’Imana idahwema guhunda umuryango wayo ingabire mu gihe gikwiye no mu buryo yigenera Yo ubwayo. Mu gushimira Imana, yashimiye n’abo Imana inyuzaho ibyiza igenera abayo, bakemera kuba ibikoresho mu biganza byayo. Yashimiye kandi n’abantu bose bafashije abapadiri n’abadiyakoni bashya mu rugendo rugana Ubusaseridoti nyobozi ku buryo bw’umwihariko ababyeyi babyaye kandi bakarera neza, abarezi babunganiye, n’abandi bose bashyigikiye kandi bakomeje gushyigikira izo ntore za Nyagasani. Kiliziya irabashima kandi ntabwo bavunikiye ubusa.

Abavandimwe bahawe Ubusaseridoti kuri uyu munsi, Umwepiskopi yabasabye kubera isi umunyu urinda ubushanguke ugatanga uburyohe n’urumuri rwirukana umwijima w’icyaha n’urupfu. Ni ubutumwa burimo inyigisho yageneye n’abandi basaseridoti bose. Yabubahaye muri aya magambo: «Bavandimwe, mwahawe ubusaseridoti mu gihe turi mu byishimo bya Yubile y’impurirane. Muri ibimenyetso bizima by’iyi Yubile. Mubaye abasaseridoti muri iyi si irangwa n’iterambere ryihuse. Ni n’igihe cy’ibigeragezo aho abakristu babangamiwe na byinshi birimo ubuhakanyi bwinjira bwiyoberanyije n’ubugomeramana butihishira. Ni igihe hagaragara ingaruka mbi nyinshi ziterwa kwimura Imana hakimikwa Bintu n’ibindi bigirwamana bifite amasura n’amazina atandukanye. Basaserdoti ba Nyagasani, ubu ni ukoga amagazi kuko amazi si yayandi. Umusaserdoti ukenewe muri iyi si iteye uku, ni urangwa n’ukwemera gushyitse, urukundo rw’Imana n’urwa mugenzi we rutajegajega, bityo akabera isi umunyu urinda ubushanguke ugatanga uburyohe, urumuri rwirukana umwijima w’icyaha n’urupfu.Urumuri rwanyu niruboneshereze rutyo abantu kugira ngo ibyo mukora, bakurizeho gusingiza So uri mu ijuru » (Mt 5,13-16). Muri iyi si yacu ibundikiwe n’igihu cy’ubujiji, ikinyoma, urumuri rw’amizero, ukuri, ineza, ubutabera, urukundo n’amahoro nirutangaze. Muri iyi si irangwa n’amacakubiri, intambara z’urudaca umusaserdoti ukenewe ni usenya inkuta zitanya abantu akubaka amateme y’ubuvandimwe burenga imipaka. Ni inkunzi n’umugabuzi w’amahoro arambye».

Nyiricyubahiro Musenyeri Visenti HAROLIMANA yashimiye n’abasaseridoti bahimbaje Yubile y’imyaka 25 y’ubupadiri cyane cyane azirikana uburyo bitanga mu butumwa bwa Kiliziya. Diyosezi ya Ruhengeri irabizirikana kandi irabashimira cyane. Yabasabye gukomeza gusohoza neza ubutumwa bahamagariwe kandi abifuriza gusenderezwa ingabire n’imigisha by’Imana. Abavandimwe bahawe ubudiyakoni bo yabasabye gukomeza kujya mu muhamagaro wabo. Ubahamagara ni indahemuka. Ubahamagara ni rukundo rutivuguruza.

Umwepiskopi yashimiye abantu bose bitabiriye ibyo birori by’Ubusaseridoti. Yashimiye Paruwasi Katedrali ya Ruhengeri, Mwange, Rwaza, Runaba, Gahunga, Janja na Kinoni, n’umuryango b’abapadri b’abamariyani bahaye Kiliziya abageni. Yashimiye n’abantu bose bitanze batizigama mu myiteguro no mu ihimbazwa ry’uyu munsi mukuru ukaba wagenze neza cyane. Mu gusoza, abakristu ba Diyosezi ya Ruhengeri n’abandi bantu bose yabifurije umugisha w’Imana no kurama.

Padiri Gratien KWIHANGANA