Ku cyumweru tariki ya 30/08/2026 muri Paruwasi ya Bumara hasorejwe Forum y’urubyiruko Gatolika ku nshuro ya 18. Ni Forum yatangiye tariki ya 26 Kanama 2026. Yitabiriwe n’urubyiruko rusaga 1500 rwaturutse mu maparuwasi agize Diyosezi ya Ruhengeri n’abandi baturutse mu Gihugu cya Uganda muri Diyosezi ya Kabare, Repubulika Iharanira Demokarasi ya Congo, muri Diyosezi ya Goma. Insanganyamatsiko y’iyo Forum yagiraga iti: “Turi abahamya b’amizero, ubuvandimwe n’amahoro”. Igitambo cya Misa gisoza iyo Forum cyayobowe na Nyiricyubahiro Musenyeri Visenti HAROLIMANA Umushumba wa Diyosezi ya Ruhengeri washishikarije urwo rubyiruko kwihatira gukunda Imana, kubaha amategeko yayo no kubaha umunsi w’icyumweru. Yabasabye kwirinda ikibi cyose bakigana urugero rwa Yezu Kristu. Yashimiye Imana ku ngabire zinyuranye yahaye urubyiruko muri iyo minsi ya Forum anayitura imigambi myiza urwo rubyiruko rwiyemeje.

Umushumba wa Diyosezi ya Ruhengeri yifurije urubyiruko kuba abahamya b’ukwemera no kwiyubakamo imbaraga zibafasha kurangamira ijuru. Yibukije urubyiruko ko arirwo mizero n’amahirwe by’umuryango, Kiliziya n’Igihugu arusaba kurangwa n’imyitwarire myiza ikwiye kuranga urubyiruko Gatolika irimo no kuba abahamya beza ba Yezu Kristu mu mvugo no mu ngiro. Yabasabye kwirinda amaraha, kwirinda gutera Imana umugongo, kwirinda gukora ibidakwiye ahubwo bagaharanira gukora icyiza. Yabashishikarije kwirinda ubusambanyi, abibutsa ko imibiri yabo ari ingoro za Roho Mutagatifu, abararikira gufata neza imibiri yabo birinda kuyihindura ingoro z’ihabara. Yabakanguriye kwirinda ibintu byose byangiza ubuzima bwabo abifuriza kubona muri Nyagasani ibisubizo bityo Yezu akaba amizero yabo. Yabakanguriye gutegura neza ejo heza habo birinda gupfusha ubusa mahirwe bahabwa n’ababyeyi, Kiliziya n’Igihugu muri rusange. Yasabye urubyiruko rukiri mu ishuri kwiga neza amasomo ruhabwa no kuyatsinda neza bakiyungura ubumenyi n’uburere bizabafasha kwiteza imbere, guteza imbere imiryango yabo, Kiliziya n’Igihugu.

Umwepiskopi yasabye abagira uruhare mu burere bw’urubyiruko barimo ababyeyi, abarezi n’abayobozi mu nzego zinyuranye kurushaho kwita ku burere bw’urubyiruko mu kurutoza indangagaciro zituma rukura neza rubereye Imana. Yasabye abapadiri bashinzwe urubyiruko kurushaho kurufasha bahereye mu maparuwasi rubarizwamo no kuruha rugari mu kugaragaza impano rwifitemo, aho rubyiruko rufashwa gukura mu kwemera aho ruri.

Yashimiye abantu bose bagira uruhare mu kwita ku rubyiruko abifuriza umugisha w’Imana; yashimiye imiryango yo muri Paruwasi ya Bumara yakiriye urubyiruko rwitabiriye iyo Forum ikanarucumbikira ayifuriza umugisha w’Imana.

Umuyobozi w’Akarere ka Musanze NSENGIMANA Claudien yashimiye Kiliziya Gatolika ku musanzu itanga mu iterambere ry’Igihugu binyuze mu bikorwa binyuranye birimo iby’uburezi, ubuvuzi, gufasha abatishoboye n’ibindi ayizeza gukomeza ubwo bufatanye. Yararikiye urubyiruko kwirinda ingeso mbi zose rukihatira kuyoboka inzira ya Yezu Kristu aho bari hose. Yabasabye kwirinda amacakubiri ayo ari yo yose bakiyemeza kubaha amategeko y’Imana no kuyakurikiza.

Urubyiruko rwiyemeje kuba intumwa nziza kuri bagenzi babo no kuzashyira mu bikorwa imyanzuro icumi rwungukiye muri iyo Forum irimo: guharanira kumenya Yezu Kristu; kwitabira guhabwa neza amasakramentu; kongera imbaraga mu isengesho; kuba abakristu bafite amizero, ubuvandimwe n’amahoro; gufasha abafite ibikomere; gukoresha neza imbugankoranyambaga; kwamagana ibiyobyabwenge; kwirinda ubunebwe; kwigana umurava amasomo ruhabwa mu mashuri; guharanira kwiteza imbere no kubaka ubuvandimwe basakaza amahoro hose.

Biteganyijwe ko Forum y’urubyiruko Gatolika ku nshuro ya 19 muri Diyosezi ya Ruhengeri izabera muri Paruwasi ya Janja mu mwaka wa 2028. Hagati aho mu mwaka utaha wa 2027 iyo Forum izabera ku rwego rwa buri Paruwasi igize Diyosezi ya Ruhengeri.

Marie Goretti NYIRANDIKUBWIMANA