Ku cyumweru tariki 31/08/2025, muri Paruwasi ya Gahunga, hizihirijwe Yubile y’impurirane mu rwego rw’urubyiruko muri Diyosezi ya Ruhengeri. Insanganyamatsiko y’iyo Yubile y’impurirane y’imyaka 2025 y’icungurwa rya Muntu na Yubile y’imyaka125 Ivanjili igeze mu Rwanda igira iti: Turangamire Kristu soko y’amizero, ubuvandimwe n’amahoro (Ef 2, 11-22). Yahuriranye no gusoza Forum y’urubyiruko gatolika ku nshuro ya 17 muri Diyosezi ya Ruhengeri yabereye muri iyo Paruwasi ya Gahunga tariki ya 27-31/08/2025. Yari ifite insanganyamatsiko igira iti: “Abiringira Uhoraho ntibadohoka mu rugendo” (Iz 40, 31). Yitabiriwe n’urubyiruko rusaga 1800 ruturutse mu ma Paruwasi yose agize Diyosezi ya Ruhengeri, muri Diyosezi ya Nyundo na Arikidiyosezi ya Kigali, no muri Uganda na Repubulika Iharanira Demokrasi ya Kongo.

Nyiricyubahiro Musenyeri Visenti HAROLIMANA, Umushumba wa Diyosezi ya Ruhengeri, yasabye urubyiruko gukunda Imana no kuyikomeraho. Yabakangururiye kwirinda ibyonnyi bibugarije birimo na za sakabaka zibangiriza ubuzima ziherekejwe n’ibishuko n’ibigeragezo byinshi. Yabasabye kutishinga ubuto, abibutsa ko ubuto bwoshya ariko ntibuherekeze. Yabamenyesheje ko bakwiye kumenya intwaro zibafasha mu bibazo zirimo mbere na mbere kumenya ko bafite Imana Umubyeyi ubakunda yo Rukundo rudacogora, abifuriza kwirinda icyabatandukanya n’Imana birinda ibyaha, kwirinda ingeso mbi zibashora mu byaha zirimo ubusambanyi, ibiyobyabwenge n’ibindi. Yabasobanuriye kurangwa n’ibyishimo byo kuba baramenye Imana.

Umushumba wa Diyosezi ya Ruhengeri yakanguriye urubyiruko kudapfusha ubusa amahirwe ruhabwa n’ababyeyi babo, Kiliziya n’Igihugu; abasaba gukoresha neza ingabire Imana yabahaye bazibyaza umusaruro bijyana no gufasha bagenzi babo kuba umunyu n’urumuri rw’isi, kugira umutima mwiza, guharanira ubuvandimwe n’amahoro arambye. Yarusabye no gufata neza imibiri yabo bazirikana ko imibiri yabo ari Ingoro ya Roho Mutagatifu bityo bakirinda ingeso y’ubusambanyi yugarije abantu, aho usanga bamwe barayigize igicuruzwa cya make. Umwepiskopi yagarutse ku musaruro uboneka mu mahuriro y’urubyiruko harimo: kubafasha kumenya guhitamo Yezu Kristu no gukunda Kiliziya; gushishoza ku muhamagaro warwo; kuba urugero rwiza mu rubyiruko no muri sosiyete; kumenya gufata icyemezo cyo kwiteza imbere; gushimangira ubuvandimwe bakesha Yezu Kristu no kubaka umubano mwiza na bagenzi babo n’ibindi. Yasabye urubyiruko kujya rukoresha neza amahirwe ruhabwa na Kiliziya muri Gahunda zitandukanye irutegurira harimo n’iyo Forum.

Iyo Forum y’urubyiruko yatangiwemo ibiganiro byarufashije gucengerwa n’Inkuru Nziza no kugera ku iterambere rya muntu wuzuye. Dore insanganyamatsiko zabyo n’ababitanze: Amateka y’umusaraba wa Forum n’agaciro kawo mu buzima bw’umukristu (Padiri Jean de Dieu Ndayisaba), Abiringira Uhoraho, ntibadohoka mu rugendo (Padiri Alexis Ndagijimana), Turangamire Kristu soko y’Amizero, ubuvandimwe n’amahoro (Musenyeri Gabin Bizimungu). Murabe maso rero, mukomere mu kwemera hatazagira ubayobya (1Kor 16, 13) cyatanzwe na Padiri Brian Monday, Kuba umujene w’umukristu mu isi ya none cyatanzwe na Sr Donatille, Ikiganiro ku mihamagaro cyatanzwe n’umuryango wa Eustache n’abihayimana, Uburenganzira bwanjye, isoko y’ibyishimo, ubutabera n’amahoro (Komisiyo y’ubutabera n’amahoro muri Diyosezi ya Ruhengeri), Nakira gute ibikomere byo ku mutima no ku mubiri, kujarajara mu madini, no kudashinga imizi mu bukristu? (Padiri Ferdinand Hagabimana), Ikoranabuhanga rudufasha gute mu kogeza Inkuru Nziza? (Padiri Jean-Bosco Baribeshya), Tinyuka ukure amaboko mu mifuka (Icyo kiganiro cyatanzwe na RIM).

Mu gusoza ibirori byo guhimbaza iyo Yubile na Forum by’urubyiruko, Umushumba wa Diyosezi ya Ruhengeri yatanze ibyemezo by’ishimwe ku bagize uruhare mu iyogezabutumwa ry’urubyiruko mu bihe bitandukanye. Yashimiye abantu bose bagira uruhare mu gufasha urubyiruko. Yashimiye ababyeyi bo muri Paruwasi ya Gahunga bakiriye urwo rubyiruko rwitabiriye iyo Forum mu ngo zabo. Yashimiye ubuyobozi bwa Leta bukorera mu Karere ka Burera bwabaye hafi urubyiruko rwitabiriye Yubile na Forum n’abandi bose bagize uruhare ngo iyo Forum ngo igende neza, abifuriza umugisha w’Imana. Biteganyijwe ko Forum y’urubyiruko gatolika ku nshuro ya 18 izabera muri Paruwasi ya Bumara mu mwaka utaha wa 2026.

Marie Goretti NYIRANDIKUBWIMANA