Ku wa gatanu tariki ya 30/05/2025 muri Paruwasi ya Butete, mu rwunge rw’Amashuri rwa Kayenzi rwaragijwe Bikira Mariya Umwamikazi w’Inyenyeri yo mu rukerera, habereye ibirori byo kwizihiza Yubile y’imyaka 100 iryo shuri rimaze rishinzwe no guhimbaza yubile y’impurirane mu rwego rw’uburezi ku rwego rwa Diyosezi ya Ruhengeri.

Igitambo cya Misa cyayobowe na Nyiricyubahiro Musenyeri Visenti HAROLIMANA Umushumba wa Diyosezi ya Ruhengeri wanayoboye umuhango wo guha umugisha ishusho ya Bikira Mariya Umwamikazi wo mu rukerera umurinzi w’iryo shuri rya Kayenzi. Yibukije abanyeshuri indangagaciro bakwiye gukomeraho yo kubaha ababyeyi, abarezi n’abandi babafasha gukura neza. Yashimye intambwe iri shuri rigezeho aryifuriza gukomeza kujya mbere bafashijwe n’Umubyeyi Bikira Mariya Umwamikazi w’inyenyeri yo mu rukerera ryaragijwe. Yifurije yubile nziza abanyeshuri, abarezi, ababyeyi, abasaseridoti, komite z’ababyeyi, abayobozi b’ibigo by’amashuri gatolika muri Diyosezi ya Ruhengeri n’abandi bose bitangira uburezi. Yabashimiye urukundo, ubwitange n’ubufatanye bagaragaza mu kurera umwana ushoboye kandi ushobotse bijyana no gutanga uburere bwuzuye ku bana. Yabasabye gukomeza kunoza ubwo butumwa. Yagize ati: «Turishimira umusaruro mwiza ugaragara amashuri yacu. Tukishimira ubufatanye bw’ababyeyi, abayobozi mu nzego zose kandi byose bikaba bitanga umusaruro».

Ku buryo bw’umwihariko, Umwepiskopi wa Diyosezi ya Ruhengeri yashimiye Leta y’u Rwanda ku bufatanye bwayo na Kiliziya Gatolika mu burezi. Yavuze ko Diyosezi ya Ruhengeri izakomeza gutanga umuganda mu burezi kugira ngo umwana agire ubumenyi n’ubushobozi bimufasha kwigirira akamaro, no kugira uruhare mu iterambere rya Kiliziya n’Igihuigu cyacu.

Nyiricyubahiro Musenyeri yagarutse no ku kababaro k’Abepiskopi Gatolika bo mu Rwanda batangarije mu nteko rusange yabo yabahurije ku Ruyenzi yasojwe tariki ya 23/05/2025 ko bababajwe n’ifungwa ry’insengero zamaze kuzuza ibisabwa ariko abakristu bakaba badashobora guhimbaza Misa, asaba ababishinzwe gusuzumana ubushishozi icyo kibazo kibangamiye abakristu n’abandi bantu mu bijyanye n’imyemerere yabo n’ubuzima bwabo ndetse n’umubano wabo n’Imana. By’umwihariko, yagaragaje akababaro afite ka Santrali nziza ya Kayenzi yujuje ibisabwa ariko ikaba itarafungurwa.

Umuyobozi w’Akarere wungirije ushinzwe ubukungu mu Karere ka Burera, NSHIMIYIMANA Jean Baptiste, ashima umusanzu Kiliziya Gatolika itanga mu iterambere ry’u Rwanda mu burezi, ayizeza gukomeza ubwo bufatanye. Abanyeshuri bishimiye iyo Yubile, biyemeje kurushaho kuba intumwa nziza z’amahoro muri bagenzi babo. Naho abayobozi b’ibigo by’amashuri biyemeje kurushaho kujya mbere mu gutanga umuganda wabo mu burezi.

Urwunge rw’Amashuri rwa Kayenzi ni ishuri ryashinzwe mu mwaka w’1925 Ubu ririmo abanyeshuri bagera ku 1556 biga mu cyiciro cy’amashuri yisumbuye mu cyiciro rusange, mu mashuri abanza no mu mashuri y’inshuke.

Muri Diyosezi ya Ruhengeri habarurirwa ibigo by’amashuri Gatolika 152 birimo abanyeshuri 151 835 n’abarezi 4 451. Muri ibyo birori hatanzwe ibihembo ku banyeshuri batsinze neza amarushanwa ategura uwo munsi. Hatanzwe ibyemezo by’ishimwe ku barezi babaye indashyikirwa kurusha abandi. Ibyo birori byaranzwe n’indirimbo, imbyino, imivugo, imikino, gutanga impano n’ubusabane.

Marie Goretti NYIRANDIKUBWIMANA