Ku cyumweru tariki ya 30/11/2025, muri Paruwasi ya Janja hizihirijwe ku rwego rwa Diyosezi ya Ruhengeri Umunsi Mpuzamahanga w’Urubyiruko ku nshuro ya 40. Usanzwe wizihizwa ku munsi mukuru wa Kristu Umwami. Igitambo cya Misa cyayobowe na Nyiricyubahiro Musenyeri Visenti HAROLIMANA. Yakanguriye urubyiruko rwa Diyosezi ya Ruhengeri kurushaho kuba abahamya b’ukuri ba Yezu Kristu mu mvugo no mu ngiro. Yasabye abapadiri bashinzwe urubyiruko mu maparuwasi agize Diyosezi ya Ruhengeri kurushaho kwita ku rubyiruko n’abana ku buryo bw’umwihariko.

Umushumba wa Diyosezi ya Ruhengeri yakanguriye urubyiruko kuba maso, kumenya gusoma ibimenyetso by’ibihe, gusenga nta buryarya, kwirinda uburangare nk’ubw’abo mu gihe cya Nowa bugaragara mu bihe byose, bukaba bugaragara no muri iki gihe cyane cyane mu muco wo kwita ku bitagira shinge.Yarusabye kwirinda kurangazwa n’ibidafite agaciro, kudatwatwa n’ibishashagirana byose no kutihambira ku biyoyoka bihuhwa n’umuyaga. Yarushishikarije guharanira kumenya icyiza, ikiboneye n’igishimisha Imana byose bijyana no gukunda Imana. Nyiricyubahiro Musenyeri yibukije urubyiruko ko gukunda Imana bijyana no kwiyaka ibikorwa by’umwijima, tugahugykira inzira y’ubutungane.Yarusabye guhora rukereye kwakira Nyagasani no kutagira ubwoba bw’ibigeragezo, arwifuriza kwizera Imana Umubyeyi ubakunda. Yashimiye abapadiri, ababyeyi n’abarezi bita ku rubyiruko, abifuriza gukomeza kubaba hafi.

Umuyobozi w’Akarere wungirije ushinzwe imibereho myiza y’abaturage mu Karere ka Gakenke, Marie Thèrese Uwamahoro, yashimye uruhare rwa Kiliziya Gatolika mu iterambere ry’Igihugu ayizeza kuzakomeza ubwo bufatanye. Yifurije urubyiruko kwimakaza indangagaciro yo gukunda umurimo no kwanga ibyaha.

Urubyiruko rwashimiye Umwepiskopi wabo n’abapadiri barushinzwe mu maparuwasi uburyo barwitaho, rugaragaza ko rutazahwema kugaragaza uruhare rwarwo mu iterambere rya Diyosezi ya Ruhengeri ruhereye mu maparuwasi. Rwiyemeje kuyoboka Kristu no gufasha bagenzi barwo gukura banogeye Imana n’abantu birinda ibibangiriza ubuzima. Biteganyijwe ko umunsi mpuzamahanga w’urubyiruko ku nshuro ya 41 wo mu mwaka utaha wa 2026 uzizihirizwa muri Paruwasi ya Mwange ku rwego rwa Diyosezi ya Ruhengeri.

Marie Goretti NYIRANDIKUBWIMANA