Ku cyumweru tariki ya 16/11/2025, muri Paruwasi ya Busengo hizihirijwe ku rwego rwa Diyosezi ya Ruhengeri Umunsi Mpuzamahanga w’Abakene wari ufite iyi nsanganyamatsiko: «Ni wowe mizero yanjye». Ni amagambo Nyirubutungane Papa Lewo wa XIV yakuye muri zaburi ya 71 ku murongo wa 5. Ibyo birori byahuriranye no guhimbaza Umunsi mukuru wa Bikira Mariya Umubyeyi w’Impuhwe waragijwe Paruwasi ya Busengo. Igitambo cya Misa cyayobowe na Nyiricyubahiro Musenyeri Visenti HAROLIMANA, Umwepiskopi wa Diyosezi ya Ruhengeri. Yakomoreye amasakramentu abagarukiramana 436 bari barayifungiye kubera impamvu zitandukanye.

Nyiricyubahiro Musenyeri yashimiye abantu bose bagira uruhare mu kwita ku bakene, abasaba kurushaho kwimakaza urukundo, ubuvandimwe n’ubuntu. Yagize ati: «Bavandimwe, ndagira ngo mbashimire uburyo mwitanga mu nzego zose, uhereye ku rwego rwa Diyosezi, urwego rwa Paruwasi, urwego rwa Santarali, mu miryangoremezo no mu matsinda. Ndagira ngo mbashimire uburyo mwumvise neza ko umukristu agomba kurangwa n’urukundo rwa kivandimwe, ntiruhere mu magambo ahubwo rukagaragara mu bikorwa by’ubwitange n’ubuntu. Ndagira ngo mbashimire uburyo hirya no hino hagaragara ibyo bikorwa by’urukundo birimo kwita ku bakene, abarwayi, indushyi n’abandi bantu bababaye. Ndabashimye kandi namwe nimwishime».

Umwepiskopi yashimye kandi urukundo, umurava n’ubwitange bw’abakora muri Caritas, abashishikariza kurushaho kunoza ubutumwa bwa Kiliziya bwo kwita ku bakene. Yagize ati: «Ndashimira by’umwihariko Caritas ya Diyosezi ya Ruhengeri mu nzego zayo zose kandi ndayishishikariza gukomeza gusohoza neza ubwo butumwa. Abari mu rwego rwa Caritas bose bazirikana ko batubereye ahakomeye, aho Kiliziya ihamagariwe gutanga ubuhamya bwayo bwerekeye urukundo rwa kivandimwe, urukundo rwitanga rutizigama, urukundo rugaragarira mu kugira ubuntu mu by’Imana yaduhaye twita ku bababaye kurusha abandi».

Umuyobozi wa Caritas muri Diyosezi ya Ruhengeri, Padiri Narcisse NGIRIMANA, na we yasabye abantu guharanira kurangwa n’urukundo rudasigara mu magambo gusa ahubwo rukajya mu bikorwa byo gutabara abavandimwe, kubafasha no kubahumuriza bikajyana no kubaho buzuzanya.

Abakristu bo muri Paruwasi ya Busengo bashima Kiliziya Gatolika yashyizeho umunsi Mpuzamahanga w’Abakene, bakayizeza kuzakomeza kuyikunda ubuziraherezo no kuyishyigikira. Bagaragaje ko kwizihiza uwo munsi bibatera imbaraga zo gushishikarira umurimo unoze kugira ngo barusheho kugera ku iterambere rya muntu wuzuye. Bashimiye Nyiricyubahiro Musenyeri Visenti Harolimana, Umushumba wa Diyosezi ya Ruhengeri, wifatanyije na bo kwizihiza Umunsi Mpuzamahanga w’Abakene, akabagaragariza urukundo rwa kibyeyi, kandi agaha abakene impano zo kubashyigikira zigizwe n’ibiribwa n’ibikoresho by’isuku.

Marie Goretti NYIRANDIKUBWIMANA