Tariki ya 21 Nzeri 2026, abapadiri ba Diyosezi Gatolika ya Ruhengeri baherekeje umushumba wabo, Musenyeri Visenti HAROLIMANA, basuye abavandimwe babo bo muri Diyosezi Gatolika ya Kabgayi bagira ubusabane mu mikino ya Basketball, Volley ball ndetse no mu mupira w’amaguru-Football. Ni urugendo rwatangiye i saa mbiri na mirongo itanu za mu gitondo ( 8: 50 am), amakipe yose ahagurukiye kuri Centre Pastoral Notre Dame de Fatima berekeza i Kabgayi. Bakiwe neza n’abapadiri ba Diyosezi ya Kabgayi,bayobowe n’Umwepiskopi wa Kabgayi, Nyiricyubahiro Musenyeri Balthazar NTIVUGURUZWA, bakorera isengesho rigufi muri Bazilika nto ya Kabgayi bayobowe na Nyiricyubahiro Musenyeri Balthazar NTIVUGURUZWA na Musenyeri Visenti HAROLIMANA. Nyuma y’aho hakurikiyeho imikino ibiri y’amaboko yabereye mu Iseminari nto ya Kabgayi yaragijwe Mutagatifu Lewo. Umukino wa Basketball warangiye Diyosezi ya Kabgayi itsinze amanota 37 kuri 33 ya Diyosezi ya Ruhengeri. Umukino wa Volleyball, warangiye Diyosezi ya Ruhengeri itsinze amaseti abiri kuri imwe (2-1) ya Diyosezi ya Kabgayi. Nyuma y’imikino y’amaboko, hakurikiyeho umupira w’amaguru wabereye kuri Stade Régional de Muhanga. Umukino warangiye ari ibitego bitanu bya Diyosezi ya Ruhengeri kuri kimwe (5-1) cya Diyosezi ya Kabgayi cyabonetse kuri Penalty mu ntangiriro z’umukino.

Nyuma y’imikino, Abepiskopi bishimiye uko imikino yagenze ndetse banashimira abitabiriye bose by’umwihariko abakristu gatolika baje, abafana ndetse n’abandi bantu bose b’umutima mwiza bari baje kwihera ijisho ubwo busabane. Nyuma y’imikino yose, hakurikiyeho ubusabane bwabereye muri Hotel Saint André. Abapadiri bishimiye uko ubusabane bwagenze ndetse banishimira ibyavuye mu mikino yakinwe. Bifuje ko ubwo busabane bwajya buhoraho mu madiyosezi yose agize Kiliziya y’Urwanda. Nyuma y’Ubusabane n’amagambo yahavugiwe, abapadiri ba Diyosezi ya Ruhengeri bafashe urugendo basubira mu Ruhengeri ahagana I saa tatu n’iminota makumyabiri n’itanu (21 : 25 pm). Iyi mikino yaje ikurikira iyari yabaye tariki 20 Mata 2026, yabereye muri Diyosezi ya Ruhengeri.